10వ తరగతి విద్యార్థులు ఆత్మవిశ్వాసంతో విజయం సాధించాలి: సర్పంచ్ నక్కా అరుణకుమారి చంద్రశేఖర్

అమలాపురం, విశాఖ సందేసం...10వ తరగతి పబ్లిక్ పరీక్షలకు హాజరుకానున్న విద్యార్థినీ విద్యార్థులు ఆత్మవిశ్వాసంతో పరీక్షలు వ్రాసి అత్యధిక మార్కులతో విజయం సాధించాలని కామనగరువు గ్రామ సర్పంచ్ నక్కా అరుణకుమారి చంద్రశేఖర్ ఉద్బోధించారు. అమలాపురం రూరల్ మండలం కామనగరువు జిల్లా ప్రజా పరిషత్ ఉన్నత పాఠశాల టెన్త్ విద్యార్థులకు పరీక్షల మెటీరియల్ ను  సర్పంచ్ అరుణ కుమారి చంద్రశేఖర్ అందజేశారు. సర్పంచ్ ఆర్థిక  సౌజన్యంతో  విద్యార్థినీ విద్యార్థులకు పరీక్షల ప్యాడ్స్, పెన్నులు, స్కేల్స్, రబ్బర్లు, పెన్సిల్స్ తో పాటు పలు వస్తువులను అందజేశారు. ఈ సందర్భంగా సర్పంచ్  మాట్లాడుతూ పరీక్షలు జీవితంలో ఒక భాగం మాత్రమేనని, పరీక్షలు అంటే భయం, ఒత్తిడికి గురికాకూడదన్నారు. స్వేచ్ఛగా, స్వతంత్రంగా, ఆనందంగా పరీక్షలు రాయాలని మనస్పూర్తిగా ఆకాంక్షిస్తూ ఆశీస్సులు అందించారు. పరీక్షల్లో అత్యధిక మార్కులు సాధించి మండల స్థాయిలో ప్రధమంగా నిలిచిన విద్యార్థులకు నగదు బహుమతులు అందించడం జరుగుతుందని సర్పంచ్ ప్రకటించారు. ఈ కార్యక్రమంలో పంచాయితీ కార్యదర్శి ఆర్ఎస్ఎస్ సూరపరాజు, జేఏబీసీ ఆదినారాయణ, ఉపాధ్యాయులు పాల్గొన్నారు.