ఏప్రిల్ 3న ‘రాకాస’ విడుదల

విశాఖపట్నంలో ఘనంగా చిత్ర యూనిట్ ప్రెస్ మీట్విశాఖపట్నం, మార్చి 22 : మెగా డాటర్ నిహారిక కొణిదెల నిర్మాతగా, యంగ్ హీరో సంగీత్ శోభన్, నయన్ సారిక జంటగా నటించిన సరికొత్త చిత్రం ‘రాకాస’. ఫాంటసీ కామెడీ థ్రిల్లర్ జోనర్‌లో రూపొందుతున్న ఈ చిత్రం ఏప్రిల్ 3వ తేదీన ప్రపంచవ్యాప్తంగా విడుదల కానుంది. ఈ చిత్ర ప్రమోషన్స్‌లో భాగంగా ఆదివారం విశాఖపట్నంలోని దశపల్ల హోటల్‌లో చిత్ర యూనిట్ మీడియా సమావేశాన్ని నిర్వహించింది.

విశాఖ అంటే ఎంతో ఇష్టం: నిర్మాత నిహారిక

ఈ సందర్భంగా నిర్మాత నిహారిక కొణిదెల మాట్లాడుతూ, ‘కమిటీ కుర్రాళ్లు’ వంటి భారీ విజయం తర్వాత తమ పింక్ ఎలిఫెంట్ పిక్చర్స్ బ్యానర్‌పై వస్తున్న మరో వైవిధ్యమైన చిత్రం ‘రాకాస’ అని తెలిపారు. విశాఖపట్నం బీచ్ అంటే తనకు ఎంతో ఇష్టమని, అందుకే ఇక్కడికి షిఫ్ట్ అయిపోవాలని ఎప్పుడూ అనుకుంటానని ఆమె చమత్కరించారు. ఈ చిత్రంలో కామెడీ చాలా నిజాయితీగా ఉంటుందని, బ్రహ్మాజీ, తనికెళ్ళ భరణి వంటి సీనియర్ నటుల రాకతో సినిమా స్థాయి పెరిగిందని పేర్కొన్నారు. హీరో సంగీత్‌తో తనకు ఇది రెండో సినిమా అని ఆమె గుర్తు చేశారు.

చందమామ కథలాంటి సినిమా: హీరో సంగీత్ శోభన్

హీరో సంగీత్ శోభన్ మాట్లాడుతూ, ఇది ఒక ఫాంటసీ కామెడీ చిత్రమని, ఇందులో హారర్ థ్రిల్లర్ ఎలిమెంట్స్ కూడా ఉంటాయని తెలిపారు. దర్శకుడు విఠలాచార్య తీసిన పాత చిత్రాల మాదిరిగా, ఒక ‘చందమామ కథ’ విన్నట్టుగా ఈ సినిమా ఉంటుందని, ఫైనల్‌గా ఇదొక క్యూట్ లవ్ స్టోరీ అని వివరించారు.

అందరినీ అలరిస్తుంది: చిత్ర యూనిట్

హీరోయిన్ నయన్ సారిక మాట్లాడుతూ, సినిమా ప్రమోషన్స్ విశాఖ నుంచే ప్రారంభించడం సంతోషంగా ఉందన్నారు. ఈ సినిమాను పిల్లలు, పెద్దలు అందరూ కలిసి ఎంజాయ్ చేయవచ్చని తెలిపారు. నటుడు గెటప్ శ్రీను మాట్లాడుతూ, ఫాంటసీ కామెడీ బాగా పండిందని, హీరో సంగీత్ తన నటనతో అదరగొట్టారని కొనియాడారు. దర్శకురాలు మానస శర్మ ఈ చిత్రాన్ని అద్భుతంగా తెరకెక్కించారని చిత్ర బృందం ప్రశంసించింది.

జీ స్టూడియోస్ సమర్పణలో రూపొందిన ఈ చిత్రం సమ్మర్ కానుకగా ప్రేక్షకులను అలరించడానికి సిద్ధమైంది. ఈ కార్యక్రమంలో చిత్ర యూనిట్ సభ్యులు  పాల్గొన్నారు.