విశాఖ ఉక్కు మాజీ డీజీఎం పెనుమత్స సాయి బాబురాజుకు సేవలో ఉక్కు సంకల్పం – 64 ఏళ్ల వయసులో 22వ సారి రక్తదానం

విశాఖపట్నం:సేవా భావం, మానవత్వం, సామాజిక బాధ్యతకు నిలువెత్తు నిదర్శనంగా నిలుస్తూ విశాఖ ఉక్కు నగరానికి చెందిన శ్రీ పెనుమత్స సాయి బాబురాజు గారు మరోసారి రక్తదానం చేసి ఆదర్శంగా నిలిచారు. విశాఖపట్నం ఉక్కు కర్మాగారం (RINL)లో ఇన్‌స్ట్రుమెంటేషన్ విభాగంలో డిప్యూటీ జనరల్ మేనేజర్‌గా (DGM) సేవలందించి పదవీ విరమణ పొందిన ఆయన, సేవలో మాత్రం ఉక్కు సంకల్పంతో ముందుకు సాగుతున్నారు.

64 ఏళ్ల వయస్సులోనూ ఆయన సామాజిక సేవా కార్యక్రమాల్లో చురుకుగా పాల్గొంటూ, ప్రతి ఆదివారం ఉక్కునగరం సమితి సేవాదళ సభ్యునిగా నారాయణ సేవ కార్యక్రమంలో నియమితంగా పాల్గొంటున్నారు.

 హోమీ భాభా క్యాన్సర్ హాస్పిటల్లో చికిత్స పొందుతున్న ఒడిశా రాష్ట్రంలోని రాయగడకు చెందిన ఒక రోగికి ఈ రోజు అత్యవసరంగా అవసరమైన O పాజిటివ్ రక్తాన్ని అందిస్తూ శ్రీ సాయి బాబురాజు గారు స్వచ్ఛందంగా రక్తదానం చేశారు. ఇది ఆయన చేసిన 22వ రక్తదానం కావడం విశేషం.

వయస్సును లెక్కచేయకుండా మానవతా దృక్పథంతో, సేవాభావంతో స్పందించిన శ్రీ సాయి బాబురాజు గారి సేవా తపనను సేవా సంస్థలు, సహచరులు మరియు సమాజంలోని పలువురు హృదయపూర్వకంగా అభినందించారు. ఆయన చూపిస్తున్న ఈ సేవా స్పూర్తి యువతకు స్ఫూర్తిగా నిలుస్తుందని వారు అభిప్రాయపడ్డారు.

శ్రీ సాయి బాబురాజు గారి మానవతా విలువలు, సేవా దృక్పథం, సామాజిక బాధ్యత సమాజానికి ఆదర్శంగా నిలుస్తున్నాయని పలువురు ప్రశంసించారు.