ఉత్తరాంధ్ర రూపురేఖలనే మార్చనున్న ఇంటిగ్రేటెడ్ స్టీల్ ప్లాంట్. జిల్లా టీడీపీ ప్రెసిడెంట్ పట్టాభి.

విశాఖ పట్నం, మార్చి 22.అనకాపల్లిలో 1.35 లక్షల కోట్ల రూపాయల పెట్టుబడితో నెలకొల్పనున్న స్టీల్ ప్లాంట్ వల్ల ఉత్తరాంధ్ర రూపురేఖలే మారి పోతుందని విశాఖ జిల్లా టీడీపీ అధ్యక్షుడు చోడే వెంకట పట్టాభిరాం పేర్కొన్నారు. ఆదివారం ఆయన విశాఖ తూర్పు నియోజక వర్గం లోని 18వ వార్డు ప్రాంతంలో ప్రతి ఇంటికి వెళ్లి ఈ ఇంటిగ్రేటెడ్ స్టీల్ ప్లాంట్ పై కరపత్రాలను పంపిణీ చేశారు. ఆయన మాట్లాడుతూ తమ కూటమి ప్రభుత్వం కొలువు దీరిన తరువాత ఉత్తరాంధ్ర అభివృద్ధి కోసం మంత్రి నారా లోకేష్ తీవ్రంగా శ్రమిస్తున్నా రన్నారు. నారా లోకేష్ చొరవ వల్లే అనకాపల్లిలో 2200 ఎకరాల విస్తీర్ణంలో ఒక లక్షా 35వేల కోట్ల రూపాయల భారీ పెట్టుబడితో 7.3 మిలియన్ టన్నుల ఉత్పత్తి సామర్థ్యంతో దేశంలోనే అతి పెద్ద ఇంటిగ్రేటెడ్ స్టీల్ ప్లాంట్ నిర్మాణం కాబోతుం దన్నారు. దీని స్థాపన వల్ల 55వేల మందికి ప్రత్యక్షంగానూ, మరి కొన్ని వేల మందికి పరోక్షంగానూ ఉపాధి దొరుకుతుందన్నారు. దీన్ని 2029వ సంవత్సరం కల్లా పూర్తి చేసి వినియోగంలోకి తెస్తారన్నారు. ఇది కాకుండా 1234 కోట్ల రూపాయల పెట్టుబడితో ఎర్త్ మూవర్స్ సంస్థ, 784 కోట్ల రూపాయల పెట్టుబడితో రిలయన్స్ ఇండస్ట్రీస్ సంస్థ ఫుడ్ ప్రాసెసింగ్ యూనిట్ను ఉత్తరాంధ్రలో నెలకొల్పుతుం దన్నారు. గ్రీన్ హైడ్రోజెన్ సిటీ ప్రాజెక్ట్, క్లీన్ టెక్ మాన్యుఫాక్చరింగ్ కంపెనీ, మెడ్ టెక్ జోన్, బిక్యూ టెక్స్టైల్స్ తదితర ప్రాజెక్టుల నిర్మాణంతో ఉత్తరాంధ్ర అన్నింటా అభివృద్ధి పథంలో పరుగులు పెడుతుందన్నారు. ఈ ప్రచార కార్యక్రమంలో విశాఖ పట్నం టీడీపీ మీడియా కో ఆర్డినేటర్ బైరెడ్డి పోతనరెడ్డి, 18వ వార్డు టీడీపీ సీనియర్ నాయకుడు గొలగాని పోలారావు, కళావతి, పలువురు టీడీపీ నాయకులు పాల్గొన్నారు.