విశాఖపట్నంలో అరుదైన ప్రాణాపాయ మెదడు వ్యాధితో బాధపడిన శిశువుకు విజయవంతమైన చికిత్స*

విశాఖపట్నంలోని మెడికవర్ ఉమెన్ & చైల్డ్ హాస్పిటల్స్‌లో వైద్యులు 11 నెలల చిన్నారిలో గుర్తించిన అత్యంత అరుదైన మరియు ప్రాణాపాయమైన మెదడు వ్యాధి Acute Necrotizing Encephalopathy (ANE)ను విజయవంతంగా చికిత్స చేశారు. ఈ వ్యాధి చాలా అరుదుగా కనిపించడమే కాకుండా, ఎక్కువ సందర్భాల్లో తీవ్రమైన మెదడు నష్టం లేదా ప్రాణాపాయం కలిగించే ప్రమాదం ఉంటుంది.

జ్వరం మరియు వరుసగా వచ్చే ఫిట్స్ కారణంగా చిన్నారిని ఆసుపత్రికి తీసుకువచ్చారు. ఫిట్స్ ఎక్కువసేపు కొనసాగడం, స్పందన తగ్గిపోవడంతో పరిస్థితి అత్యంత కీలకంగా మారింది. వెంటనే పిల్లల ఐసీయూ (PICU)లో చేర్చి అత్యవసర చికిత్స అందించారు. శ్వాసలో ఇబ్బంది పెరగడంతో కొంతకాలం వెంటిలేటర్‌పై ఉంచారు. MRI స్కాన్‌లో మెదడులోని ముఖ్య ప్రాంతాల్లో తీవ్రమైన వాపు మరియు దెబ్బతినడం గుర్తించబడింది.

డా. సాయి సునీల్ కిషోర్ నేతృత్వంలో డా. విజయ్ కృష్ణ, డా. మంజు వాణి కలిసి చిన్నారికి యాంటీవైరల్ మందులు, ఫిట్స్ నియంత్రణ ఔషధాలు, హైడోస్ స్టెరాయిడ్లు మరియు IVIG చికిత్స అందించారు. అదనంగా మెదడులో ఇన్‌ఫ్లమేషన్‌ను తగ్గించేందుకు Tocilizumab అనే ప్రత్యేక బయోలాజికల్ ఔషధాన్ని వినియోగించారు.

చికిత్సకు మంచి స్పందన చూపిన చిన్నారి క్రమంగా కోలుకుని పిలిస్తే స్పందించడం, శబ్దాలను గుర్తించడం ప్రారంభించింది. అనంతరం వెంటిలేటర్‌ను విజయవంతంగా తొలగించి, ప్రస్తుతం స్థిరమైన ఆరోగ్యంతో డిశ్చార్జ్ చేశారు.

సమయానికి గుర్తింపు, అత్యాధునిక చికిత్సలు మరియు వైద్య బృందం నిరంతర పర్యవేక్షణ వల్ల ఈ క్లిష్ట పరిస్థితిలో విజయవంతమైన ఫలితం సాధ్యమైందని వైద్యులు తెలిపారు