ఎల్లమ్మగా ప్రసిద్ధి చెందిన అమ్మవారిని రక్షక దేవతగా విశాఖ వాసులు కొలుస్తారని విశాఖ దక్షిణ నియోజకవర్గం తెలుగుదేశం పార్టీ ఇన్చార్జ్, ఎన్టీఆర్ ఆరోగ్యశ్రీ ట్రస్ట్ ఎగ్జిక్యూటివ్ వైస్ చైర్మన్ సీతంరాజు సుధాకర్ అన్నారు

విశాఖపట్నం జగదాంబ జంక్షన్  ఎల్లమ్మ తోటలో కొలువైన శ్రీశ్రీశ్రీ ఎల్లమ్మ అమ్మవారి వార్షిక జాతర మహోత్సవాలు గత ఫిబ్రవరి నెల 26వ తేదీన ఘనంగా నిర్వహించారు.అందులో భాగంగా అమ్మవారి దేవాలయం దగ్గర ఆదివారం సుమారు 5000 మంది భక్తులకు ఎల్లమాంబ యువజన సేవా సంఘం ఆధ్వర్యంలో అన్నసమారాధన కార్యక్రమం నిర్వహించారు. 

ఈ  కార్యక్రమానికి అతిధిగా సీతంరాజు సుధాకర్ హాజరై అమ్మవారిని దర్శించుకుని ప్రత్యేక పూజలు చేసారు. అనంతరం అన్నసమారాధన కార్యక్రమంలో పాల్గొని భక్తులకు స్వయంగా అన్నప్రసాదాలు వడ్డన చేసారు. ఈ సందర్భంగా సీతంరాజు మాట్లాడుతూ భక్తుల కోరికలను తీర్చే శక్తి స్వరూపిణిగా, స్థానికులకు ఆరాధ్య దైవంగా పూజలందుకుంటున్న ఎల్లమ్మ అమ్మవారి పురాతన దేవాలయం అభివృద్ధికి తన వంతు సహాయ సహకారాలు అందిస్తామని తెలిపారు. ఈ కార్యక్రమంలో విశాఖ దక్షిణ నియోజకవర్గం టీడీపీ బీసీ సెల్ అధ్యక్షుడు  కొణతాల శ్రీనివాస్,ఎల్లమ్మ యువజన సంఘం సభ్యులు ఎల్లాజీ, శివ తదితరులు పాల్గొన్నారు.