కూటమి ప్రభుత్వంతోనే అభివృద్ధి సాధ్యం : ఎమ్మెల్యే అయితాబత్తుల ఆనందరావు... గోడిలంకలో బ్లాక్ పబ్లిక్ హెల్త్ యూనిట్ నిర్మాణానికి శంకుస్థాపన.... ఆశా వర్కర్ల విన్నపానికి ఎమ్మెల్యే ఆనందరావు తక్షణ స్పందన...

అల్లవరం, విశాఖ సందేసం...వైసీపీ ప్రభుత్వం సంక్షేమం ముసుగులో గ్రామాల అభివృద్ధి మరిచిందని  కూటమి ప్రభుత్వంతోనే  గ్రామాల అభివృద్ధి సాధ్యమని అమలాపురం ఎమ్మెల్యే అయితాబత్తుల ఆనందరావు అన్నారు.

అల్లవరం మండలం గోడిలంక గ్రామంలో ప్రజలకు మెరుగైన వైద్య సేవలు అందించే లక్ష్యంతో నూతనంగా నిర్మించనున్న బ్లాక్ పబ్లిక్ హెల్త్ యూనిట్ (బి  పి హెచ్ యు) భవన నిర్మాణానికి  ఎమ్మెల్యే  అయితాబత్తుల ఆనందరావు  మంగళవారం  శంకుస్థాపన చేశారు. ఈ హెల్త్ యూనిట్ అందుబాటులోకి రావడం వల్ల స్థానిక ప్రజలకు త్వరితగతిన వైద్య పరీక్షలు, రోగ నిర్ధారణ సేవలు గ్రామంలోనే అందుబాటులోకి వస్తాయని ఎమ్మెల్యే పేర్కొన్నారు. ప్రభుత్వ నిధులతో నిర్మించనున్న ఈ యూనిట్‌లో అత్యాధునిక ల్యాబ్ సౌకర్యాలు మరియు నిరంతర ఆరోగ్య పర్యవేక్షణ వ్యవస్థ ఉండబోతోందన్నారు. నియోజకవర్గవ్యాప్తంగా ప్రతి గ్రామంలోనూ వైద్య మౌలిక సదుపాయాలను మెరుగుపరచడమే కూటమి ప్రభుత్వ ప్రధాన ఉద్దేశమని, అందులో భాగంగానే గోడిలంకలో ఈ యూనిట్‌ను ఏర్పాటు చేస్తున్నామన్నారు. ఎమ్మెల్యే ఆనందరావు  అక్కడ ఉన్న ఆశా వర్కర్లతో ప్రత్యేకంగా సమావేశమై సమస్యలు అడిగి తెలుసుకున్నారు. ఆశా వర్కర్లు ఎదుర్కొంటున్న సమస్యలను స్వయంగా అడిగి తెలుసుకున్నారు. అలాగే, ప్రస్తుత కూటమి ప్రభుత్వం ప్రజల కోసం అమలు చేస్తున్న సంక్షేమ పథకాలు మరియు వైద్య రంగంలో తీసుకువస్తున్న మార్పుల వల్ల ప్రజలకు కలుగుతున్న మేలుపై వారి అభిప్రాయాలను అడిగి తెలుసుకున్నారు. కూటమి ప్రభుత్వం అందిస్తున్న సంక్షేమ ఫలాలు ప్రతి ఇంటికీ చేరుతున్నాయని ఆశా వర్కర్లు  ఎమ్మెల్యేకు  వివరించారు. సమావేశం సందర్భంగా ఆశా వర్కర్లు తమకు రెగ్యులర్ మీటింగ్స్ మరియు సమావేశాలు నిర్వహించుకోవడానికి సరైన స్థలం లేక ఇబ్బందులు ఎదురవుతున్నాయని ఎమ్మెల్యే దృష్టికి తీసుకువచ్చారు. తమ సమస్యలను చెప్పుకోవడానికి మరియు చర్చించుకోవడానికి ఒక ప్రత్యేకమైన "షెడ్డు" (మీటింగ్  షెడ్) నిర్మించి ఇవ్వాలని కోరారు. వారి విజ్ఞప్తికి ఎమ్మెల్యే ఆనందరావు  సానుకూలంగా స్పందిస్తూ, తక్షణమే షెడ్డు నిర్మాణానికి హామీ ఇచ్చారు. క్షేత్రస్థాయిలో కష్టపడే ఆశా వర్కర్ల సౌకర్యార్థం త్వరలోనే ఈ నిర్మాణాన్ని పూర్తి చేస్తామని భరోసా ఇచ్చారు. 

ఈ కార్యక్రమంలో సర్పంచ్ రుద్రరాజు పవిత్ర లక్ష్మిపతి రాజు రాష్ట్ర క్షత్రియ కార్పొరేషన్ డైరెక్టర్  దెందుకూరి సత్తిబాబురాజు  జడ్పీటీసీ కొనుకు గౌతమి,  ఎంపీపీ ఇళ్ల  శేషగిరిరావు, అధికారి విజయలక్ష్మి, కంకిపాటి గోపి, కడలి వెంకటేశ్వరరావు (కె.వి) ముత్యాల బాబి,  వేగిరాజు వెంకట్రాజు, దాట్ల గోపిరాజు, వేగిరాజు శ్రీనురాజు,  గుబ్బల రామ్ ప్రసాద్, పశ్చిమాల ఏడుకొండలు, కొల్లు విష్ణు మూర్తి, మంతెన సురేష్ రాజు,  మండల అధికారులు, ఆరోగ్య శాఖ సిబ్బంది, గ్రామస్తులు  పెద్ద సంఖ్యలో పాల్గొన్నారు.