తిరుపతిలో వైఎస్సార్సీపీ మహిళా నేతలపై జరిగిన అమానుష దాడికి నిరసనగా అమలాపురంలో భారీ ప్రదర్శన...

అమలాపురం, విశాఖ సందేసం.తిరుపతి గ్రాండ్ రిడ్జ్ హోటల్ వద్ద టీటీడీ చైర్మన్ బి.ఆర్. నాయుడు రాజీనామా డిమాండ్‌తో శాంతియుతంగా నిరసన తెలుపుతున్న వైఎస్సార్సీపీ మహిళా నేతలపై జరిగిన అమానుష దాడిని నిరసిస్తూ, నేడు అమలాపురంలో వైఎస్సార్సీపీ శ్రేణులు భారీ నిరసన కార్యక్రమం చేపట్టారు . పార్టీ జిల్లా అధ్యక్షుడు, మాజీ ఎమ్మెల్యే చిర్ల జగ్గరెడ్డి, ఎమ్మెల్సీ తోట త్రిమూర్తులు నేతృత్వంలో జరిగిన ఈ కార్యక్రమంలో పార్టీ ముఖ్య నాయకులు, కార్యకర్తలు పెద్ద సంఖ్యలో పాల్గొన్నారు. ప్రభుత్వ నిరంకుశత్వం: శాంతియుతంగా నిరసన తెలిపే హక్కును కాలరాస్తూ మహిళా నేతలపై భౌతిక దాడులకు దిగడం హేయమైన చర్య అని నాయకులు ధ్వజమెత్తారు. దాడికి గురైన బాధితులపైనే తిరిగి తప్పుడు కేసులు పెట్టడం ప్రభుత్వ అప్రజాస్వామిక పాలనకు నిదర్శనమని విమర్శించారు.

మహిళా నేతల ఆగ్రహం: మాజీ ఎంపీ చింతా అనురాధ, మాట్లాడుతూ.. రాష్ట్రంలో మహిళా నాయకులకు రక్షణ కరువైందని, తప్పుడు కేసులు పెట్టి భయపెట్టాలని చూడటం సాధ్యం కాదని హెచ్చరించారు.మహిళా నేతలపై దాడికి పాల్పడిన వారిపై తక్షణమే కఠిన చర్యలు తీసుకోవాలని, బనాయించిన తప్పుడు కేసులను ఉపసంహరించుకోవాలని వైఎస్సార్సీపీ డిమాండ్ చేసింది. ఈ నిరసన కార్యక్రమంలో చిర్ల జగ్గరెడ్డి, తోట త్రిమూర్తులు, మాజీ ఎంపీ చింత అనురాధ,పినిపే శ్రీకాంత్, పార్టీ వివిధ అనుబంధ విభాగాల అధ్యక్షులు, కౌన్సిలర్లు, మరియు భారీ సంఖ్యలో వైఎస్సార్సీపీ కార్యకర్తలు పాల్గొన్నారు. పట్టణ ప్రధాన వీధుల గుండా నిరసన ర్యాలీ నిర్వహిస్తూ ప్రభుత్వం మరియు టీటీడీ చైర్మన్ వైఖరికి వ్యతిరేకంగా నినాదాలు చేశారు.