డాక్టర్. కంభం మాణిక్య కుమారికి “వృక్ష మిత్ర అవార్డు”

విశాఖపట్నం. -విశాఖ సందేశం వర్తవాహని -9-2026 వర్తవాహనిపర్యావరణ పరిరక్షణ, జీవ వైవిధ్య సంరక్షణ, కాలుష్య నియంత్రణ, ప్లాస్టిక్ వ్యతిరేక ఉద్యమాలు, వాతావరణ పరిరక్షణ వంటి కార్యక్రమాల్లో విశేష కృషి చేసినందుకు సెయింట్ జోసెఫ్స్ మహిళా కళాశాల, విశాఖపట్నం వృక్షశాస్త్ర విభాగాధిపతి డా. కంభం మాణిక్య కుమారికి శ్రీ కన్నం శ్రీనివాసరావు మెమోరియల్ ట్రస్ట్ ఆధ్వర్యంలో  ద్వారకానగర్ వద్ద, బా - బాపు సంఘం లో  ప్రతిష్ఠాత్మకమైన “వృక్ష మిత్ర అవార్డు–2026” ప్రదానం చేశారు.

ఈ అవార్డును ముఖ్య అతిథి ఆచార్య నాగార్జున విశ్వవిద్యాలయ మాజీ ఉపకులపతి ప్రొఫెసర్ బాలమోహన్ దాస్, ఆంధ్ర విశ్వవిద్యాలయం పర్యావరణ శాస్త్ర విభాగం మాజీ ఆచార్యులు ప్రొఫెసర్ ఈ. యు. బి. రెడ్డి చేతుల మీదుగా డా. మాణిక్య కుమారి అందుకున్నారు. ట్రస్ట్ ప్రధాన కార్యదర్శి శ్రీ కె. వి. రమణారావు, మాజీ పార్లమెంట్ సభ్యులు, మాజీ టీటీడీ ఛైర్మన్ శ్రీ పప్పల చలపతి, బా - బాపు సంఘం అధ్యక్షురాలు  శ్రీమతి పి. అంతర్వేది ఆధ్వర్యంలో ఈ కార్యక్రమం నిర్వహించారు.

డా. మాణిక్య కుమారి వివిధ స్వచ్ఛంద సంస్థలు, సంస్థలతో కలిసి కార్పొరేట్ సోషల్ రెస్పాన్సిబిలిటీ  కార్యక్రమాల ద్వారా సుస్థిర అభివృద్ధి లక్ష్యాల (ఎస్ డి జిలు) సాధనకు కృషి చేస్తున్నారు. ఆమె ఆంధ్రప్రదేశ్ రాష్ట్ర జీవ వైవిధ్య మండలితో కలిసి విశాఖపట్నం జిల్లాలోని 60 గ్రామాల్లో పీపుల్స్ బయోడైవర్సిటీ రిజిస్టర్ల  పరిశీలన, ధృవీకరణ మరియు నవీకరణ కార్యక్రమాలను చేపట్టారు.

పర్యావరణ పరిరక్షణలో ఆమె చేసిన విశేష కృషిలో సెయింట్ జోసెఫ్స్ మహిళా కళాశాల విద్యార్థులు, అధ్యాపకులు ఒక గంటలో 11,91,000 విత్తన బంతులను తయారు చేసి, 2025 జూలైలో రెండు ప్రపంచ రికార్డులు నెలకొల్పిన ఘనత ముఖ్యమైనది. ఈ కార్యక్రమంలో డా. మాణిక్య కుమారి కీలకంగా పాల్గొన్నారు. అంతేకాకుండా అటవీ శాఖకు చెందిన డివిజనల్ ఫారెస్ట్ ఆఫీసర్లు, రేంజ్ అధికారులు, వనసైనికులకు విత్తన బంతుల తయారీ, వాటి వ్యాప్తి విధానాలపై శిక్షణ అందించారు.

విశాఖపట్నంలో అర్బన్ బయోడైవర్సిటీ (నగర జీవ వైవిధ్యం) పరిరక్షణకు సంబంధించి ఎఫ్ ఆర్ సీసీఈ తో కలిసి ఆమె పలు కార్యక్రమాలు నిర్వహించారు. అలాగే “సేవ్ ఎర్త్” కార్యక్రమంలో ఆమె అందించిన సేవలకు చిన్న జీయర్ స్వామి నుండి ప్రశంసలు అందుకున్నారు. సముద్ర, తీర ప్రాంత జీవ వైవిధ్య పరిరక్షణతో పాటు ప్లాస్టిక్ కాలుష్య నివారణ కోసం డా. మాణిక్య కుమారి ఆధ్వర్యంలో బీచ్ క్లీనింగ్ కార్యక్రమాలు నిర్వహించి, విద్యార్థులు మరియు ప్రజల్లో పర్యావరణ పరిరక్షణపై అవగాహన కల్పించారు. పర్యావరణ పరిరక్షణ, జీవ వైవిధ్య సంరక్షణ, కాలుష్య నియంత్రణ, ప్లాస్టిక్ నిర్మూలన మరియు వాతావరణ పరిరక్షణ కోసం ఆమె చేస్తున్న నిరంతర కృషికి గుర్తింపుగా ఈ ప్రతిష్ఠాత్మక “వృక్ష మిత్ర అవార్డు–2026” లభించింది.

ఈ సందర్భంగా కళాశాల ప్రిన్సిపాల్ డా. సిస్టర్ షైజీ పి. డి., కళాశాల యాజమాన్యం, అధ్యాపకులు మరియు విద్యార్థులు డా. మాణిక్య కుమారిని అభినందించి, పర్యావరణ పరిరక్షణకు ఆమె అందిస్తున్న విశిష్ట సేవలను ప్రశంసించారు