అమలాపురం, విశాఖ సందేసం....ఆక్వా రంగాన్ని నమ్ముకున్న రైతులను నష్టాల ఊబిలోకి నెడుతున్న స్థిరీకరణ లేని ధరల పెంపుదలపై ఉద్యమించాల్సిన అవసరం ఎంతైనా ఉందని రాష్ట్ర ఆక్వా రైతు సంఘ అధ్యక్షుడు గొట్టిముక్కల గాంధీ భగవాన్ రాజు అన్నారు. ఈ నెలాఖరులోగా మేతల తయారీదారులనుంచి సానుకూల నిర్ణయం వెలువడితే సరి లేకుంటే ఆ కంపెనీలకు చెందిన మేతల కొనుగోళ్లు నిలిపివేయాలని, వచ్చే ఏడాది నాటికి పంటకాలం పూర్తిచేసుకుని ఆతరువాత పంట వేయకుండా పంట విరామం చేయాలని ఆయన పిలుపునిచ్చారు. ఆక్వారంగంలో ఎదుర్కొంటోన్న సమస్యలపై అంబేడ్కర్ కోనసీమ జిల్లా అమలాపురంలో నిర్వహించిన ఛలో అమలాపురం కార్యక్రమంలో భాగంగా సోమవారం ఆక్వారైతు బ్రతుకు పోరాట సభ విజయవంతం అయ్యింది.. ఈ కార్యక్రమానికి నెల్లూరు నుంచి శ్రీకాకుళం వరకు ఉన్న ఆక్వా రైతు సంఘ నాయకులు, రైతులు భారీ స్థాయిలో తరలివచ్చారు. అంతకుముందు పేరూరు వై.జంక్షన్ నుంచి సభావేదిక వరకు భారీగా ఆక్వారైతుంతా ర్యాలీగా నినాదాలు చేసుకుంటూ తరలివచ్చారు. అంబేడ్కర్ కోనసీమ జిల్లా ఆక్వారైతు సంఘ అధ్యక్షుడు దెందుకూరి సత్తిబాబు రాజు అధ్యక్షతన జరిగిన ఈ సభలో రాష్ట్రంలోని నలుమూలల నుంచి తరలివచ్చిన నాయకులు పాల్గొని మాట్లాడారు. ఈసందర్భంగా రాష్ట్ర అధ్యక్షుడు గాంధీ భగవాన్ రాజు మాట్లాడుతూ ఆక్వా రంగంలో సీడ్ దశనుంచి పంట చేతికి వచ్చి రొయ్యల ఎగుమతి వరకు ఆక్వా రైతులు దగా పడుతున్నారన్నారు. అంతర్జాతీయ మార్కెట్లో ధరలు స్థిరంగా ఉన్నా కానీ రైతుల వద్ద తక్కువకు కొనుగోలు చేయడం జరుగుతోందని, రైతులకు న్యాయం జరిగేలా కనీస మద్దతు ధర కల్పించాలన్నారు. అప్సడా చట్టం ఉన్నా అది రైతులకు వర్తించని దుస్తితి ఉందన్నారు. ప్రభుత్వం చొరవ చూపించి ఆక్వారంగంలో తిష్టవేసిన సిండికేట్, దళారీ వ్యవస్థలను రూపుమాపాలని కోరారు. సమస్యలు పరిష్కారం చూపకుంటే వచ్చే ఏడాది మార్చి తరువాత పంటలు వేయకుండా రైతులంతా పంట విరామం ప్రకటించాలని సూచించారు.
0 Comments