అన్ని డివిజన్లలోని ప్రయాణికులకు, రైల్వే సిబ్బందికి 100% సురక్షితమైన, నాణ్యమైన తాగునీటిని అందిస్తున్న దక్షిణ తీర రైల్వే*

 

నిరంతర నాణ్యతా పర్యవేక్షణ డ్రైవ్‌ల ద్వారా స్టేషన్లు, రైల్వే కాలనీలలో 100% బ్యాక్టీరియోలాజికల్ భద్రతా ప్రమాణాలు నమోదు.

* క్షేత్రస్థాయి తనిఖీలలో స్వయంగా పాల్గొంటూ, ప్రయాణికులు మరియు కాలనీ వాసులతో నేరుగా తాగునీటి నాణ్యతను సమీక్షిస్తున్న జనరల్ మేనేజర్ శ్రీ సందీప్ మాథుర్.

* ప్రయాణికుల సౌకర్యాలకు అత్యున్నత ప్రాధాన్యతనిస్తూ నిరంతర పరీక్షలు, తక్షణ దిద్దుబాటు చర్యలు చేపడుతున్న నాలుగు డివిజన్ల డివిజనల్ రైల్వే మేనేజర్లు (DRMs).

ప్రయాణికుల క్షేమం, ప్రజారోగ్యం మరియు ఉద్యోగుల సంక్షేమానికి కట్టుబడి, దక్షిణ తీర రైల్వే (SCoR) పరిధిలోని అన్ని రైల్వే స్టేషన్లు, సేవా కేంద్రాలు మరియు నివాస కాలనీలలో 100% సురక్షితమైన, పరిశుభ్రమైన తాగునీటిని అందించడానికి సమగ్రమైన, బహుళ అంచెల చర్యలను చేపడుతోంది. జోనల్ పరిపాలనా యంత్రాంగం నిత్యం నాణ్యతా పర్యవేక్షణను ముమ్మరం చేస్తూ, జోన్ అంతటా తాగునీటి ప్రమాణాల నిర్వహణపై నిరంతర దృష్టి సారిస్తోంది.

జనరల్ మేనేజర్ శ్రీ సందీప్ మాథుర్ మార్గదర్శకత్వంలో, రైల్వే బోర్డు మార్గదర్శకాలకు అనుగుణంగా దక్షిణ తీర రైల్వే వైద్య విభాగం, పర్యావరణ-ఆరోగ్య విభాగం మరియు ఇంజనీరింగ్ విభాగాలు సంయుక్తంగా నిరంతరాయంగా పటిష్టమైన నాణ్యతా పరీక్షా డ్రైవ్‌లను చేపట్టాయి. అదేవిధంగా, క్షేత్రస్థాయిలో నాణ్యతా ప్రమాణాలు పక్కాగా అమలయ్యేలా జోన్‌లోని నాలుగు డివిజన్ల డివిజనల్ రైల్వే మేనేజర్లు (DRMs) స్వయంగా పర్యవేక్షిస్తున్నారు.

2026 ఆగస్టు 18 నుండి సెప్టెంబర్ 24 వరకు జోన్ అంతటా నిర్వహించిన సమగ్ర పరీక్షా డ్రైవ్ ఈ నిరంతర ప్రయత్నాల అద్భుత ఫలితాలను స్పష్టం చేస్తోంది:

*195 రైల్వే స్టేషన్లలో విస్తృతంగా నాణ్యతా పరీక్షలు నిర్వహించారు. కాలుష్య నివారణ చర్యల్లో భాగంగా సేకరించిన మొత్తం 12,790 రెసిడ్యువల్ క్లోరిన్ నమూనాలను పరీక్షించగా, అవన్నీ పూర్తి ఫిట్‌నెస్ ప్రమాణాలను కలిగి ఉన్నట్లు నిర్ధారణ అయింది. అంతేకాకుండా, 195 స్టేషన్లలో నిర్వహించిన విస్తృత బ్యాక్టీరియోలాజికల్ పరీక్షలలో అన్ని నమూనాలు (1,051 నిర్ణయాత్మక పరీక్షలకు గాను 1,051) 100% సంపూర్ణ భద్రతను నమోదు చేశాయి. తద్వారా ప్యాసింజర్ స్టేషన్లలో సరఫరా చేసే నీరు సహజసిద్ధంగా పరిశుద్ధమైనదని, నేరుగా తాగడానికి అత్యంత సురక్షితమైనదని పునరుద్ఘాటించబడింది. స్టేషన్లలో రసాయన (కెమికల్) పరీక్షలను సైతం నిశితంగా పర్యవేక్షిస్తూ, ఖనిజాల సమతుల్యతను (మినరల్ బ్యాలెన్స్) కాపాడేందుకు డివిజనల్ ఇంజనీరింగ్ బృందాలతో ఎప్పటికప్పుడు తక్షణ సమన్వయ చర్యలు చేపడుతున్నారు*.

రైల్వే ఉద్యోగులకు సైతం సమాన ప్రాధాన్యతనిస్తూ రైల్వే కాలనీలు, రైల్వే ఆసుపత్రులు, హెల్త్ యూనిట్లు, శిక్షణా సంస్థలు, పాఠశాలలు మరియు DRM, చీఫ్ వర్క్‌షాప్ మేనేజర్ (CWM) కార్యాలయాలు వంటి ప్రధాన పరిపాలనా భవనాలలో సమగ్ర తాగునీటి నాణ్యతా పర్యవేక్షణను క్రమపద్ధతిలో నిర్వహించారు. *68 కాలనీలలో నిర్వహించిన రెసిడ్యువల్ క్లోరిన్ పరీక్షలు నూటికి నూరు శాతం (100%) నాణ్యతా ప్రమాణాలను సాధించాయి. అదేవిధంగా, 29 కాలనీలు మరియు వైద్య విభాగాలలో చేపట్టిన బ్యాక్టీరియోలాజికల్ పరీక్షలు 100% ఉత్తీర్ణతను సాధించి, పూర్తి భద్రతను నిర్ధారించాయి*.

రైలు ప్రయాణికులకు మరియు సిబ్బందికి స్వచ్ఛమైన తాగునీటిని అందించాలనే సంకల్పంతో, దక్షిణ తీర రైల్వే జనరల్ మేనేజర్ శ్రీ సందీప్ మాథుర్ తమ సాధారణ క్షేత్రస్థాయి పర్యటనల్లో నీటి నాణ్యతను స్వయంగా పరిశీలిస్తున్నారు. జోన్ పరిధిలోని వివిధ స్టేషన్లు మరియు రైల్వే ప్రాంతాలలో జరిగే తనిఖీల సమయంలో, ఆయన ప్లాట్‌ఫారమ్‌లపై ఉండే ప్రయాణికులతోను, కాలనీలలో నివసించే రైల్వే ఉద్యోగుల కుటుంబాలతోను ముఖాముఖిగా సంభాషిస్తూ, సరఫరా అవుతున్న నీటి నాణ్యత మరియు ఇతర సౌకర్యాల గురించి ప్రత్యక్ష ఫీడ్‌బ్యాక్‌ను తెలుసుకుంటున్నారు.

అన్ని స్టేషన్లు, కాలనీలు మరియు రైల్వే సంస్థలలో ఎల్లవేళలా స్వచ్ఛమైన తాగునీరు అందుబాటులో ఉండేలా దక్షిణ తీర రైల్వే నిరంతరం ఒక మిషన్ మోడ్‌లో కృషి చేస్తుందని అధికారులు స్పష్టం చేశారు.

ముఖ్య పౌర సంబంధాల అధికారి (CPRO)

దక్షిణ తీర రైల్వే, విశాఖపట్నం