విశాఖపట్నంలోని రైల్వే ఇండోర్ స్పోర్ట్స్ ఎన్‌క్లేవ్ (RISE)లో నాలుగు రోజుల పాటు జరిగిన 80వ పురుషుల, 19వ మహిళల అఖిల భారత రైల్వే బాక్సింగ్ ఛాంపియన్షిప్–2026 నేడు ఘనంగా ముగిసింది. ఈ పోటీల్లో క్రీడాకారులు తమ ప్రతిభ, పట్టుదల, పోటీతత్వాన్ని అద్భుతంగా ప్రదర్శించారు.
ఈ ముగింపు కార్యక్రమానికి దక్షిణ తీర రైల్వే జనరల్ మేనేజర్ శ్రీ సందీప్ మాథుర్ ముఖ్య అతిథిగా హాజరయ్యారు. డివిజనల్ రైల్వే మేనేజర్ శ్రీ లలిత్ బోహ్రా, ప్రిన్సిపల్ చీఫ్ పర్సనల్ ఆఫీసర్ శ్రీ ఎల్.వి.వి.ఎస్. పాత్రుడు, ప్రిన్సిపల్ చీఫ్ ఎలక్ట్రికల్ ఇంజినీర్ శ్రీ టి.కె. సిన్హా గౌరవ అతిథులుగా పాల్గొన్నారు.
దక్షిణ తీర రైల్వే స్పోర్ట్స్ అసోసియేషన్ (SCoRSA) ఆధ్వర్యంలో అక్టోబర్ 7 నుంచి 10 వరకు ఈ ఛాంపియన్షిప్ నిర్వహించారు. దేశవ్యాప్తంగా 16 రైల్వే జోన్లకు ప్రాతినిధ్యం వహిస్తూ 86 మంది పురుషులు, 56 మంది మహిళలు కలిపి మొత్తం 142 మంది బాక్సర్లు ఈ పోటీల్లో పాల్గొన్నారు.
కొత్త రైల్వే జోన్ ఏర్పాటైన తర్వాత దక్షిణ తీర రైల్వే స్పోర్ట్స్ అసోసియేషన్ నిర్వహించిన తొలి ప్రధాన జాతీయ స్థాయి క్రీడా కార్యక్రమంగా ఈ ఛాంపియన్షిప్ ఒక ముఖ్యమైన మైలురాయిగా నిలిచింది. కొత్తగా ఏర్పాటైన జోన్‌గా దక్షిణ తీర రైల్వే ఈ పోటీల్లో పాల్గొనడంతో పాటు, జాతీయ స్థాయిలో తన క్రీడా ప్రతిభను ప్రదర్శించేందుకు ఇది చక్కని వేదికగా నిలిచింది.
ముగింపు కార్యక్రమంలో ప్రసంగించిన దక్షిణ తీర రైల్వే జనరల్ మేనేజర్ శ్రీ సందీప్ మాథుర్, ఛాంపియన్‌షిప్‌ను విజయవంతంగా నిర్వహించిన నిర్వాహకులను, పోటీల్లో పాల్గొన్న క్రీడాకారులను అభినందించారు. ఈ పోటీలను చిరస్మరణీయమైన క్రీడా కార్యక్రమంగా నిలిపిన ప్రతి ఒక్కరి కృషిని ఆయన ప్రశంసించారు.
ఇలాంటి ప్రతిష్ఠాత్మక ఛాంపియన్‌షిప్‌లు ప్రతిభావంతులైన యువ క్రీడాకారులను గుర్తించేందుకు, పోటీ ప్రమాణాలను మెరుగుపరచేందుకు, ఎలైట్ నేషనల్ బాక్సింగ్ ఛాంపియన్‌షిప్‌లతో పాటు అంతర్జాతీయ పోటీలకు బాక్సర్లను సిద్ధం చేసేందుకు కీలక వేదికలుగా నిలుస్తాయని శ్రీ సందీప్ మాథుర్ తెలిపారు. నాలుగు రోజుల పాటు క్రీడాకారులు ప్రదర్శించిన క్రమశిక్షణ, సాంకేతిక నైపుణ్యం, పట్టుదల, క్రీడాస్ఫూర్తిని ఆయన ప్రత్యేకంగా అభినందించారు.
ఇటీవల ప్రపంచకప్‌లో పాల్గొన్న నమన్ తన్వర్, నిఖిల్ దూబే, అన్మోల్‌లను కూడా జనరల్ మేనేజర్ అభినందించారు. నమన్ తన్వర్, నిఖిల్ దూబే కామన్వెల్త్ క్రీడల్లోనూ భారతదేశానికి ప్రాతినిధ్యం వహించారని ఆయన గుర్తుచేశారు.
ఈ ఛాంపియన్షిప్ విజయవంతంగా నిర్వహించడంలో కృషి చేసిన SCoRSA బృందాన్ని అభినందించిన ఆయన, బాక్సింగ్ ఫెడరేషన్ ఆఫ్ ఇండియా ప్రతినిధులు, రిఫరీలు, న్యాయనిర్ణేతలు, కోచ్‌లు, సాంకేతిక సిబ్బంది, సహాయక సిబ్బంది, స్వచ్ఛంద సేవకుల సేవలను ప్రశంసించారు. క్రమశిక్షణ, పట్టుదల, నిష్పాక్షిక క్రీడా వైఖరి, ప్రత్యర్థుల పట్ల గౌరవం వంటి విలువలను పాటిస్తూ, భవిష్యత్తులో జరిగే జాతీయ, అంతర్జాతీయ పోటీల్లో విజయాలు సాధించాలని పాల్గొన్న బాక్సర్లకు ఆయన ఆకాంక్షించారు.
క్రీడల ప్రోత్సాహం, ప్రతిభావంతులైన క్రీడాకారుల అభివృద్ధి పట్ల భారతీయ రైల్వేలకు ఉన్న నిబద్ధతను ఈ ఛాంపియన్షిప్ మరోసారి చాటిచెప్పిందని శ్రీ బోహ్రా పేర్కొన్నారు. అదే సమయంలో, జాతీయ క్రీడా రంగంలో తనదైన గుర్తింపును ఏర్పరచుకునేందుకు దక్షిణ తీర రైల్వేకు ఈ పోటీలు ఒక ముఖ్యమైన అవకాశాన్ని కల్పించాయని తెలిపారు.
అనంతరం జనరల్ మేనేజర్ శ్రీ సందీప్ మాథుర్, డివిజనల్ రైల్వే మేనేజర్ శ్రీ లలిత్ బోహ్రాతో కలిసి విజేతలు, రన్నరప్‌లకు ట్రోఫీలు, పతకాలు, ధ్రువపత్రాలను అందజేశారు. రైల్వే స్పోర్ట్స్ ప్రమోషన్ బోర్డు కార్యవర్గ సభ్యులు, ఈవెంట్ నిర్వాహకులు, బాక్సింగ్ సంఘానికి చెందిన ప్రముఖులకు స్మారక చిహ్నాలను అందజేశారు.
తుది ఫలితాలు
ఓవరాల్ టీమ్ ఛాంపియన్: నార్తర్న్ రైల్వే – 6 స్వర్ణ పతకాలు.
ఓవరాల్ టీమ్ రన్నరప్: ఈస్టర్న్ రైల్వే – 5 స్వర్ణ పతకాలు.
ఉత్తమ పురుష బాక్సర్: కె. సంజీత్ సింగ్ – ఈస్టర్న్ రైల్వే.
ఉత్తమ వర్ధమాన పురుష బాక్సర్: ఆశిష్ – నార్తర్న్ రైల్వే.
ఉత్తమ మహిళా బాక్సర్: నకిత కుమారి – నార్త్ ఫ్రంటియర్ రైల్వే.
ఉత్తమ వర్ధమాన మహిళా బాక్సర్: జి. నిహారిక – దక్షిణ తీర రైల్వే.
ఛాంపియన్‌షిప్‌ను విజయవంతం చేసిన పోటీల్లో పాల్గొన్న బాక్సర్లు, అధికారులు, నిర్వాహకులందరికీ దక్షిణ తీర రైల్వే అభినందనలు తెలిపింది. క్రీడాకారులు తమ క్రీడా ప్రస్థానంలో మరిన్ని విజయాలు సాధించాలని ఆకాంక్షించింది.
వై. బాలాజీ కిరణ్
ముఖ్య ప్రజాసంబంధాల అధికారి
దక్షిణ తీర రైల్వే ,-విశాఖపట్నం
0 Comments