అప్రమత్తత, విధి నిర్వహణలో అంకితభావం కనబరిచిన ఆరుగురు రైల్వే ఉద్యోగులకు డీఆర్‌ఎం భద్రతా పురస్కారాలు విశాఖపట్నం: నవంబర్ 2, 2026:**రైళ్ల సురక్షిత రాకపోకలకు విశేష అప్రమత్తత, సమయస్ఫూర్తి, విధి నిర్వహణలో అంకితభావం ప్రదర్శించిన ఆరుగురు రైల్వే ఉద్యోగులకు విశాఖపట్నం డివిజనల్ రైల్వే మేనేజర్ (డీఆర్‌ఎం) శ్రీ లలిత్ బోహ్రా జూన్ నుంచి ఆగస్టు 2026 కాలానికి సంబంధించిన డివిజనల్ రైల్వే మేనేజర్ భద్రతా పురస్కారాలను అందజేశారు.

 విశాఖపట్నం డివిజన్న వంబర్ 2న విశాఖపట్నంలోని డివిజనల్ కార్యాలయంలో జరిగిన కార్యక్రమంలో ఏడీఆర్‌ఎంలు, సీనియర్ డివిజనల్ ఆపరేషన్స్ మేనేజర్ (Sr.DOM), సీనియర్ డివిజనల్ సెక్యూరిటీ కమిషనర్ (Sr.DSC), సీనియర్ డివిజనల్ ఎలక్ట్రికల్ ఇంజనీర్ (ఆపరేషన్స్) (Sr.DEE/OP) సమక్షంలో ఈ పురస్కారాలను ప్రదానం చేశారు.

రైళ్ల నిర్వహణ సమయంలో కీలకమైన భద్రతా లోపాలను సకాలంలో గుర్తించి, సంబంధిత అధికారులకు వెంటనే సమాచారం అందించడం ద్వారా సంభవించే ప్రమాదాలను నివారించడంలో వీరు కీలక పాత్ర పోషించారు. వారి సేవలను గుర్తిస్తూ ఈ పురస్కారాలను అందజేశారు.

పురస్కార గ్రహీతలు మరియు వారి విశేష సేవలు:**

1. **శ్రీ బి.కె. పవన్ కుమార్, సీనియర్ గూడ్స్ ట్రైన్ మేనేజర్/SCMN** – గూడ్స్ రైలు రోలింగ్ పరీక్ష సమయంలో ఒక వ్యాగన్‌లో కాయిల్ స్ప్రింగ్ లేకపోవడాన్ని గుర్తించి, వెంటనే సంబంధిత అధికారులకు సమాచారం అందించారు.

2. **శ్రీ నూక ఉమామహేశ్వరరావు, సీనియర్ ట్రైన్ మేనేజర్/SCMN** – పక్క లైన్‌లో ప్రయాణిస్తున్న రైలుతో సిగ్నల్స్ మార్పిడి సమయంలో పలు వ్యాగన్ల అడాప్టర్లు వాలిన స్థితిలో ఉండటాన్ని గమనించి, వెంటనే సంబంధిత ట్రైన్ మేనేజర్‌కు సమాచారం అందించారు.

3. **శ్రీ టి. విజయ కుమార్, లోకో పైలట్ (గూడ్స్)/MGPV** – రైలు తనిఖీ సమయంలో ఒక వ్యాగన్‌లో పీయూ క్యాప్ విరిగిపోవడం, హెలికల్ స్ప్రింగ్ దెబ్బతినడాన్ని గుర్తించి, సంబంధిత కంట్రోల్ అధికారులకు సమాచారం అందించారు.

4. **శ్రీ బత్తుల కోటేశ్వరరావు, సీనియర్ గూడ్స్ ట్రైన్ మేనేజర్/SCMN** – పక్క లైన్‌లో కదులుతున్న రైలులో ఒక వ్యాగన్ యాక్సిల్ అడాప్టర్ తీవ్రంగా వాలిన స్థితిలో ఉండటాన్ని గుర్తించి, వెంటనే అధికారులకు తెలియజేశారు. దీంతో క్యారేజ్ అండ్ వ్యాగన్ (C&W) సిబ్బంది సకాలంలో లోపాన్ని సరిచేశారు.

5. **శ్రీ వి.కె. సింగ్, గూడ్స్ ట్రైన్ మేనేజర్/SCMN** – రైలులోని వ్యాగన్ల నుంచి ఆయిల్ లీకేజీ కావడం, చివరి బ్రేక్‌వ్యాన్‌లో హ్యాండ్ బ్రేక్ పనిచేయకపోవడాన్ని గుర్తించి, వెంటనే సంబంధిత అధికారులకు సమాచారం అందించారు.

6. **శ్రీ వరహాల బాబు డొంక, లోకో పైలట్ (గూడ్స్)/MGPV** – రైలును విధుల్లోకి తీసుకునే సమయంలో ఒక వ్యాగన్‌లో ట్రాలీ సైడ్ బేరర్లు స్థానభ్రంశం చెందినట్లు గుర్తించి, వెంటనే సంబంధిత అధికారులకు తెలియజేశారు.

ఈ సందర్భంగా డీఆర్‌ఎం శ్రీ లలిత్ బోహ్రా పురస్కార గ్రహీతలను అభినందిస్తూ, వారి అప్రమత్తత, అంకితభావం, విధి నిర్వహణలో చూపిన బాధ్యతాయుతమైన ప్రవర్తనను ప్రశంసించారు. రైల్వే భద్రతలో ప్రతి స్థాయిలో అప్రమత్తత, లోపాలను సకాలంలో గుర్తించడం, తక్షణమే సంబంధిత అధికారులకు సమాచారం అందించడం అత్యంత కీలకమని ఆయన పేర్కొన్నారు.

రైల్వే ప్రమాదాల నివారణకు, రైళ్ల సురక్షిత రాకపోకలకు ఉద్యోగుల్లో భద్రతా స్పృహను మరింత పెంపొందించడంలో ఇటువంటి పురస్కారాలు ప్రోత్సాహకరంగా నిలుస్తాయని విశాఖపట్నం డివిజన్ పేర్కొంది.