పక్షవాతం వచ్చినప్పుడు ప్రతి నిమిషం విలువైనదే! .......ప్రజలు స్ట్రోక్ లక్షణాలను గుర్తించి, వెంటనే ఆసుపత్రికి చేరుకోవాలి.....మెడికవర్ హాస్పిటల్,*

విశాఖపట్నం, అక్టోబర్ 29:*ప్రపంచ స్ట్రోక్ దినోత్సవం సందర్భంగా ప్రజల్లో పక్షవాతం (బ్రెయిన్ స్ట్రోక్) పట్ల అవగాహన పెంపొందించుకోవాలని ప్రముఖ న్యూరాలజిస్ట్  సూచించారు. స్ట్రోక్ అనేది మెదడుకు రక్తప్రసరణ ఆగిపోవడం లేదా మెదడులో రక్తనాళం చిట్లి రక్తస్రావం జరగడం వల్ల సంభవించే అత్యవసర వైద్య పరిస్థితి. సకాలంలో చికిత్స అందిస్తే ప్రాణాలను కాపాడటంతో పాటు శాశ్వత వైకల్యాన్ని తగ్గించే అవకాశం ఉందని  తెలిపారు.

ఈ  సందర్భంగా ప్రజల్లో పక్షవాతం (స్ట్రోక్‌) పట్ల అవగాహన కల్పించేందుకు వైద్యుల సమక్షంలో ఒక చిన్న నాటికను ప్రదర్శించారు. ఈ నాటిక ద్వారా స్ట్రోక్‌ లక్షణాలను ముందుగానే గుర్తించడం, సకాలంలో వైద్య సహాయం పొందడం, అత్యవసర చికిత్స ప్రాముఖ్యతను వివరించారు.  ఈ కార్యక్రమం ప్రజలకు స్ట్రోక్‌ పట్ల అవగాహన పెంపొందించడంలో ఉపయోగకరంగా నిలిచింది.

స్ట్రోక్ BEFAST : నడవలేకపోవడం , చూపు తగ్గడం లేదా రెండుగా  కనిపించడం , ముఖం వంగిపోవడం,  నవ్వినప్పుడు ముఖం ఒకవైపు వంగడం, చేయి లేదా కాలు బలహీనపడటం,  ముఖ్యంగా శరీరంలో ఒకవైపు అకస్మాత్తుగా బలహీనత లేదా పక్షవాతం రావడం, మాట తడబడటం, మాట్లాడలేకపోవడం లేదా ఇతరులు చెప్పేది అర్థం చేసుకోలేకపోవడం, సమతుల్యత కోల్పోవడం లేదా తీవ్రమైన తలనొప్పి రావడం. ఈ లక్షణాల్లో ఏ ఒక్కటి కనిపించినా ఆలస్యం చేయకుండా అత్యవసర వైద్య సహాయం పొందాలి. లక్షణాలు కొద్దిసేపట్లో తగ్గిపోయినా నిర్లక్ష్యం చేయకూడదు.

గోల్డెన్ అవర్ ప్రాముఖ్యత : ఇస్కీమిక్ స్ట్రోక్‌లో అర్హులైన రోగులకు లక్షణాలు ప్రారంభమైన మొదటి 4.5 గంటల్లోపు ఇంట్రావీనస్ థ్రాంబోలైసిస్ ద్వారా రక్తనాళంలో ఏర్పడిన గడ్డను కరిగించే చికిత్స అందించవచ్చు. ఎంపిక చేసిన కొందరు రోగులకు మెదడు ఇమేజింగ్ పరీక్షల ఆధారంగా ఎక్కువ సమయం గడిచిన తర్వాత కూడా చికిత్స చేసే అవకాశం ఉంటుంది. పెద్ద రక్తనాళాల్లో గడ్డ ఉన్న కొందరు రోగులకు మెకానికల్ థ్రాంబెక్టమీ ద్వారా గడ్డను తొలగించవచ్చు. రోగిని ఇంట్లోనే వేచి చూడటం, స్వయంగా మందులు ఇవ్వడం లేదా లక్షణాలు తగ్గుతాయని ఆలస్యం చేయడం ప్రమాదకరం. వెంటనే అంబులెన్స్ సహాయంతో స్ట్రోక్ చికిత్స అందుబాటులో ఉన్న ఆసుపత్రికి తీసుకెళ్లాలి.

స్ట్రోక్‌ను నివారించవచ్చు : అధిక రక్తపోటు, మధుమేహం, అధిక కొలెస్ట్రాల్, ధూమపానం, ఊబకాయం, శారీరక శ్రమ లేకపోవడం వంటి అంశాలు స్ట్రోక్ ప్రమాదాన్ని పెంచుతాయి. రక్తపోటు, మధుమేహాన్ని నియంత్రించడం, పొగతాగడం మానేయడం, ఆరోగ్యకరమైన ఆహారం తీసుకోవడం, క్రమం తప్పకుండా వ్యాయామం చేయడం, వైద్యుల సూచనల ప్రకారం మందులు వాడటం ద్వారా స్ట్రోక్ ప్రమాదాన్ని తగ్గించవచ్చు. “స్ట్రోక్‌లో సమయం అంటే మెదడు. లక్షణాలను గుర్తించండి, వెంటనే స్పందించండి, ప్రాణాలను కాపాడండి” అని డాక్టర్  ప్రజలకు పిలుపునిచ్చారు.

ఈ కార్య క్రమం లో సీనియర్ కన్సల్టెంట్ న్యూరాలజిస్ట్ డాక్టర్ కె. సత్యారావు,  డా. టి సురేష్, డా. కే సురేష్, డా. దలై, డా.వినయ్ భూషణ్,  డా. పవన్ రుద్రా , డా. అనిల్ దేవర, సెంటర్ హెడ్ డా. అరుణ్ కుమార్  పాల్గొన్నారు.